“TikTok” sosial şəbəkəsi Nyu-York rəsmilərinin irəli sürdüyü yeni ittihamlarla növbəti böyük qalmaqalın mərkəzinə düşüb. Şirkət istifadəçilər, xüsusilə də yetkinlik yaşına çatmayanlar üzərində məzmun filtrləmə və alqoritm yeniləmə funksiyaları ilə bağlı gizli sınaqlar keçirməkdə günahlandırılır.
Məhkəmə materiallarına əsasən, platforma istifadəçilərə arzuolunmaz məzmunu təmizləyən “Algo Refresh” funksiyasının işləməyən versiyasını təqdim edib. İstintaq şirkətin bu yolla tətbiqdə keçirilən vaxtı və reklam gəlirlərini artırmağa çalışdığını, sınaqlar naminə təhlükəsizlik mexanizmlərini söndürərək zərərli materialların yayılmasına şərait yaratdığını iddia edir.
“TikTok” ittihamları rədd etsə də, bu cür qalmaqallar platformaya ciddi maliyyə zərbəsi vurur. Qeyd edək ki, “ByteDance” şirkəti uşaqların məxfiliyinin pozulmasına görə 400 milyon dollar, bu ilin sentyabrında isə analoji iddialarla bağlı Alabama ştatına 300 milyon dollara qədər təzminat ödəməyə razılaşıb.
