OpenAI ChatGPT-nin pulsuz istifadəçiləri üçün mühüm yenilik elan edib.
Şirkət mətn əsaslı söhbətlərə tətbiq edilən istifadə limitini aradan qaldırmağa hazırlaşır. Beləliklə, Free və Go istifadəçiləri ChatGPT ilə limitsiz şəkildə mətn əsaslı söhbət edə biləcəklər. Şirkətin açıqlamasına görə, Free və Go istifadəçiləri üçün standart model yeni GPT-5.6 Luna olacaq. Bu model hazırda istifadə edilən GPT-5.5-i əvəz edəcək.
Bununla yanaşı, istifadəçilərə yeni “Think” düyməsi təqdim ediləcək. Bu düymə daha mürəkkəb suallar zamanı modelin daha güclü düşünmə imkanlarından istifadə etməyə imkan verəcək. Ancaq limitsiz istifadə yalnız mətn əsaslı söhbətlərə şamil olunacaq. Faylların yüklənməsi və emalı, şəkillər, səs funksiyaları və süni intellekt vasitəsilə şəkil yaradılması üçün ayrıca istifadə limitləri qalacaq.
OpenAI ödənişli Plus və Pro abunəçiləri üçün də yeniliklər təqdim edib. Bu istifadəçilər təkmilləşdirilmiş GPT-5.6 Sol modelindən istifadə edə biləcəklər. Şirkətin bildirdiyinə görə, yeni GPT-5.6 Sol gündəlik suallar, internetdə araşdırma, məsləhət, planlaşdırma, mətn yazılması və qərarvermə kimi tapşırıqlarda daha yaxşı nəticə göstərir. Modelin cavablarının daha yığcam və etibarlı olması da əsas yeniliklərdən biridir.
