“Google” Xəritələr platformasını süni intellekt dəstəklı inkişaf mühitinə çevirib. “Gemini” modelləri ilə gücləndirilmiş yeni alətlər interaktiv xəritə layihələri, xüsusi dizaynlar və məkan əsaslı cavablar təqdim edir.
Valyuta.az xəbər verir ki, “Google”, Xəritələr məhsulunu təkcə naviqasiya tətbiqi olmaqdan çıxarıb, süni intellekt dəstəklı inkişaf platformasına çevirir. Şirkət Xəritələrə inteqrasiya etdiyi yeni “Gemini” modelləri ilə həm istifadəçilər, həm də proqram tərtibatçıları üçün geniş funksiyalara malik süni intellekt paketi elan edib.
Yeni xüsusiyyətlərin mərkəzində “builder agent” dayanır. İstifadəçilər artıq sadəcə bir əmr yazmaqla interaktiv xəritə layihələri yarada bilirlər. Hazırlanan layihəni “Firebase Studio” vasitəsilə öncədən nəzərdən keçirmək və ya ixrac etmək mümkündür. Bu alətlə birlikdə təqdim edilən “styling agent” isə markaların rəng palitralarına və ya tema seçimlərinə uyğun xüsusi xəritə dizaynları yaratmağa imkan verir. Beləliklə, şirkətlər xəritə əsaslı tətbiqlərdə vizual bütövlüyü qoruya bilirlər.
Proqram tərtibatçılarına yönəlik ən diqqətçəkən yeniliklərdən biri “Grounding Lite” funksiyasıdır. Bu xüsusiyyət “Model Context Protocol” (MCP) standartından istifadə edərək süni intellekt modellərinin birbaşa “Google Xəritələr” məlumatları ilə əlaqə qurmasını təmin edir. Beləliklə, “ən yaxın supermarket nə qədər uzaqdadır?” kimi suallara anlıq və məkan əsaslı cavablar yaratmaq mümkün olur. Yeni “Contextual View” komponenti isə bu cavabları siyahı, xəritə və ya 3D vizuallaşdırma şəklində təqdim edir.
“Google” həmçinin “MCP server” adlı yeni kod köməkçisini təqdim edib. Bu alət proqramçılara təbii dildə suallar verməklə “Maps API” haqqında texniki məlumat əldə etməyə imkan yaradır. Şirkət qısa müddət əvvəl “Gemini”nin əmrlər sətri vasitəsinə Xəritələr məlumatlarına çıxış verən əlavələr də əlavə etmişdi.
İstehlakçılar üçün isə “Gemini” dəstəklı əllərsiz naviqasiya funksiyası və Hindistanda istifadəyə verilmiş sürət limiti ilə bağlı hadisə bildirişləri ön plana çıxır. “Google” bununla Xəritələr tətbiqini yalnız istiqamət tapma vasitəsi deyil, geniş funksiyalı ağıllı xəritə ekosisteminə çevirməyi hədəfləyir.
