Azərbaycan və Almaniya arasında ikitərəfli münasibətlər, hər iki ölkənin qarşılıqlı maraqlarını və strateji məqsədlərini nəzərə alaraq davamlı inkişaf edir.
Azərbaycan Respublikası ilə Almaniya Federativ Respublikası arasında ikitərəfli münasibətlər zaman-zaman müxtəlif sahələrdə genişlənmiş, hər iki ölkənin maraqlarına uyğun bir çox təşəbbüslər həyata keçirilmişdir. Bu münasibətlər çoxşaxəli olub, siyasi, iqtisadi, mədəni, təhsil və elmi-texniki sahələrdə inkişaf etməkdədir. Qeyd edək ki, Almaniya, Azərbaycanın müstəqilliyini 1991-ci ildə tanıyan ilk Avropa ölkələrindən biri olub və bu, ikitərəfli münasibətlərin qurulmasına təkan vermişdir. Həmçinin Almaniya, Azərbaycanın beynəlxalq təşkilatlardakı fəaliyyətində Azərbaycanı dəstəkləyib. Almaniya Azərbaycanı artıq keçmişdə qalmış “Dağlıq Qarabağ münaqişəsi” ilə bağlı məsələlərdə də müxtəlif beynəlxalq formatlarda mövqeyini dəstəkləyib. Bu münasibət, bir çox beynəlxalq məsələlərdə qarşılıqlı həmrəylik və anlayış göstərir. İqtisadi sahədə iki ölkə arasında əhəmiyyətli ticarət əlaqələri mövcuddur. Almaniya Azərbaycanın əsas ticarət tərəfdaşlarından biridir və bu əlaqələr xüsusən neft və qaz, maşınqayırma, avtomobil sənayesi, yüksək texnologiyalar və elektrik avadanlıqları sahələrində genişlənmişdir. Almaniyanın Azərbaycanda bir çox şirkəti enerji, avtomobil, mühəndislik və müxtəlif sənaye sahələrində fəaliyyət göstərir. Bu sahələrdə əməkdaşlıq, həm ticarət, həm də texnoloji transfer baxımından vacib rol oynayır. Almaniya həmçinin Azərbaycanda iqtisadi infrastrukturun inkişafında mühüm rol oynayır. Azərbaycan, Almaniyanın texnologiyalarına, xüsusilə də enerji və nəqliyyat sahələrində olan yeniliklərə maraq göstərir. İki ölkə arasında ticarət dövriyyəsinin artırılması məqsədilə müxtəlif iqtisadi forumlar, sərgilər və işgüzar görüşlər təşkil olunur. Bu tədbirlər, biznes mühiti yaratmaq və hər iki ölkənin sahibkarları arasında daha sıx əməkdaşlıq qurmağa imkan verir. Enerji sahəsi, Azərbaycan və Almaniya arasında əlaqələrin əsas istiqamətlərindən biridir. Azərbaycan, zəngin neft və qaz ehtiyatlarına malik bir ölkə olaraq, Almaniyanın enerji ehtiyaclarını qarşılamaq üçün strateji əhəmiyyət daşıyır. Almaniya, Azərbaycanın enerjisini yalnız öz bazarına deyil, həmçinin Avropa bazarına ixrac etməyə də maraqlıdır. Bu, Xəzər regionunun Avropa enerji bazarına inteqrasiyası baxımından mühüm bir addım olub. Almaniya, Azərbaycanın “yaşıl enerji” və bərpa olunan enerji layihələrinə də böyük maraq göstərir və bu sahədə birgə layihələrin həyata keçirilməsi üçün müsbət şərait mövcuddur. Azərbaycan və Almaniya arasında mədəniyyət sahəsində də əməkdaşlıq mövcuddur. Almaniyanın Azərbaycandakı mədəniyyət mərkəzləri, alman dilini, mədəniyyətini və sənətini tanıtmaqda mühüm rol oynayır. Həmçinin, Almaniyanın Azərbaycanda təhsil müəssisələri və proqramları mövcuddur. Bu təhsil proqramları, xüsusilə gənclər üçün müxtəlif mübadilə və təhsil imkanları yaradır. Alman dili Azərbaycanda geniş öyrənilir və bir çox tələbə Almaniyada təhsil almağa maraq göstərir. Bu günlərdə Almaniya Federativ Respubublikasının prezidenti Frank-Valter Ştaynmerin ölkəmizə rəsmi səfəri, səfər zamanı ölkə başçıları tərəfindən müzakirə edilən məsələlər, irəli sürülən təşəbbüslər, səsləndirilən bəyanatlar onu deməyə əsas verir ki, iki ölkə arasında münasibətlər davamlı inkişaf edir və bu münasibətlər dövlətlərin milli maraqları qorunmaqla, qarşılıqlı hörmət və ehtirama əsaslanır. Azərbaycan və Almaniya arasında ikitərəfli münasibətlər, hər iki ölkənin qarşılıqlı maraqlarını və strateji məqsədlərini nəzərə alaraq davamlı inkişaf edir.
Qulam Əsədov;
Neftçala rayon ziyalısı
