Azərbaycan Respublikasının Avropa təsisatları ilə münasibətləri son illərdə olduqca mürəkkəb və sınaqlarla dolu bir mərhələdən keçmişdir. Möhtərəm Prezident cənab İlham Əliyev IV Şuşa Qlobal Media Forumundakı çıxışında bu münasibətlərin pərdəarxası məqamlarına toxunaraq mühüm faktları açıqlamışdır.
Dövlət başçısı qeyd etmişdir ki, Avropa Komissiyası ilə əvvəlki dövrdə, xüsusən də Avropa diplomatiyasının keçmiş rəhbəri Cozep Borrelin qeyri-konstruktiv və dağıdıcı fəaliyyəti səbəbindən münasibətlərdə çox ciddi çətinliklər yaşanmışdı. Bu gün həmin dağıdıcı siyasətin əsl səbəbləri tam ifşa olunmuşdur. Belə ki, Borrel və onun ətrafındakı anti-Azərbaycan qruplaşması Beynəlxalq Məhkəmənin keçmiş hakimi Luis Moreno Okampo kimi korrupsiyaya uğramış şəxslərlə əlbir fəaliyyət göstərmişdir. Okampo özü də etiraf etmişdir ki, bu fəaliyyət müqabilində Borrelə maliyyə vəsaitləri ödənilirdi və bu çirkli pulların mənbəyi birbaşa Ermənistanda ev dustaqlığında olan məlum rus-erməni oliqarxına gedib çıxırdı. Lakin bu neqativ qrupun siyasətdən kənarlaşdırılması ilə Avropa Komissiyası ilə əlaqələrdə yeni, daha sağlam bir səhifə açılmışdır. Təkcə bu ilin bir neçə ayı ərzində Brüsseldən Bakıya reallaşan yüksək səviyyəli səfərlər — martda Avropa İttifaqı Şurasının Prezidenti Koştanın, mayda Avropa diplomatiyasının yeni rəhbəri Kallasın və iyulda Avropa Komissiyasının Prezidenti Ursula Fon der Lyayenin Azərbaycana gəlməsi və verilən müsbət bəyanatlar tərəflərin qarşılıqlı əməkdaşlıq səviyyəsindən son dərəcə razı olduqlarını nümayiş etdirir. Azərbaycanın Avropa Şurasının Parlament Assambleyası (AŞPA) ilə münasibətlərində yaranmış hazırkı gərgin vəziyyət, bəzi Avropa dairələrinin ölkəmizin öz ərazi bütövlüyünü bərpa etməsinə qarşı apardığı qərəzli və ikiüzlü siyasətin birbaşa təzahürüdür.
Mövzuya xüsusi toxunan Prezident İlham Əliyev xatırlatmışdır ki, Azərbaycan ərazilərinin 20 faizi 30 il ərzində Ermənistanın işğalı altında qaldığı və orada kütləvi etnik təmizləmələr aparıldığı dövrdə AŞPA tərəfindən Azərbaycana qarşı heç vaxt heç bir sanksiya tətbiq olunmamışdı. Lakin 2023-cü ilin sentyabrında Azərbaycan özünün beynəlxalq hüquqla tanınan suveren ərazilərini separatçılardan və qanunsuz işğalçı qüvvələrdən 100 faiz təmizlədikdən dərhal sonra, bu təşkilat ölkəmizə qarşı qərəzli kampaniyaya başlamış və 2024-cü ilin yanvarında Azərbaycan nümayəndə heyətinin səsvermə hüququnu qanunsuz olaraq məhdudlaşdırmışdır. Bu addımın insan hüquqları ilə heç bir əlaqəsi yoxdur; bu, sadəcə olaraq ölkəmizin öz suverenliyini bərpa etməsinə görə qərəzli şəkildə cəzalandırılması cəhdidir. Buna cavab olaraq Azərbaycan nümayəndə heyəti olduqca müdrik qərar qəbul edərək təşkilatda fəaliyyətini dayandırmışdır. Dövlət başçısı bəyan etmişdir ki, Azərbaycan bu ədalətsiz münasibət qarşısında təkcə AŞPA-dakı üzvlüyünü dondurmağı deyil, bütövlükdə Avropa Şurası təsisatından tamamilə çıxmağı ciddi şəkildə nəzərdən keçirir. Baxmayaraq ki, Avropa Şurasının Baş katibi Alen Bersenin xahişi ilə bu radikal addım hələlik dayandırılıb, lakin qarşı tərəfdən ədalətli və obyektiv addımlar atılmayacağı təqdirdə Azərbaycan öz milli və suveren maraqlarını qorumaq üçün bütün adekvat qərarları qətiyyətlə verməyə hazırdır.
İldırım Zeynallı;
Neftçala rayonu
