Səudiyyə Ərəbistanının dövlət neft şirkəti “Saudi Aramco”nun oktyabr ayında Asiya və ABŞ alıcıları üçün hər növ xam neftin qiymətlərini endirəcəyi xəbərləri fonunda bazar ertəsi etalon neft markalarının qiymətləri ciddi şəkildə eniş yaşayıb.
BAKU.NEWS xəbər verir ki, “London ICE Futures” birjasında “Brent” markalı neftin noyabr fyuçerslərinin qiyməti bazar ertəsi 41,95 dollar/barrel təşkil edib ki, bu da əvvəlki sessiyanın sonundakı qiymətdən 0,71 dollar (1,66%) azdır.
Nyu-York Ticarət Birjasında (NYMEX) isə oktyabr ayı üçün “WTI” markalı xam neftinin fyuçersləri bu vaxta qədər 39,16 dollar/barrel təşkil edib ki, bu da əvvəlki sessiyanın səviyyəsindən 0,61 dollar (1,53%) azdır.
“Trading Economics”in məlumatına görə, ticarət zamanı hər iki markanın müqavilələri son iki ayda ən aşağı səviyyəyə(“Brent” bir barrel üçün 41,71 dollara, “WTI” 38,75 dollara) düşüb.
“Saudi Aramco” keçən həftə sonu ən böyük regional bazarı olan Asiya üçün “Arab Light” markalı neftin qiymətinin ikinci ay ardıcıl olaraq bir barrel üçün 1,4 dollar endiriləcəyini elan edib. Nəticədə, “Arab Light” nefti Oman və Dubaydan gələn neftdən 0,8 dollar ucuz başa gələcək. Asiya müştəriləri üçün “Arab Super Light” və “Arab Extra Light” bir barrel üçün 1,5 dollar, “Arab Heavy” isə 0,9 dollar ucuzlaşacaq.
Oktyabr ayında amerikalı müştərilər üçün isə neft qiymətlərindəki enmə bir barrel üçün 0,5/0,7 dollar arasında dəyişəcək.
