“Kapital Bank” ASC istiqraz buraxılışı vasitəsilə 50 milyon manat həcmində vəsait cəlb edib.
Bank hər birinin nominal dəyəri 100 manat olan 500 min ədəd istiqraz yerləşdirib.
İstiqrazların illik faiz gəlirliliyi 10,5%, tədavül müddəti isə 24 aydır.
Faizli və təmin edilməmiş istiqrazlar qapalı yerləşdirmə üsulu ilə satılıb. Bu isə qiymətli kağızların geniş ictimaiyyətə deyil, əvvəlcədən müəyyən edilmiş məhdud investor dairəsinə təklif edildiyini göstərir. İnvestorlar arasında banklar, digər maliyyə təşkilatları, şirkətlər və fiziki şəxslər ola bilər.
İstiqrazların yerləşdirilməsi 8 oktyabr 2026-cı il tarixində həyata keçirilib.
Bankın istiqrazlar üzrə illik faiz öhdəliyi 5,25 milyon manat, iki il ərzində isə ümumilikdə 10,5 milyon manat təşkil edir.
Xatırladaq ki, “Kapital Bank” 2006-cı ildə yaradılıb. Onun nizamnamə kapitalı 265,85 milyon manatdır. Bankın əsas səhmdarı “Bir Ekosistem” MMC-dir.
Plat.az
